Si un lien de téléchargement expire ou est invalide, veuillez le signaler dans les commentaires afin que nous puissions le corriger.

mardi 26 février 2019

مراحل تأسيس شركة بالمغرب




مراحل تأسيس شركة 

اشنو المراحل اللي كندير باش ولا كنتبع باش نقوم بتأسيس شركة: 
1- كنقوم بطلب الشهادة السلبية يعني certificat négatif، اشنو كتعني هد الشهادة؟... هد الشهادة هيا الاسم او التسمية ديال الشركة اللي باغي تصاوب.... كيفاش نصاوبها و منين نجيبها؟!... اولا كتدخل للموقع directeinfo.com او cri.com كتمشي لبلاصة certificat négatif كتعمر داكشي اللي كيتطلب منك، سميتك كنيتك العنوان ديالك الايمايل نمرة التيليفون، من بعد كدو لسمية الشركة كيعطيوك 5 الاختيارات تعمرهم خاص ميكونوش منقبل... كيفاش ميكونوش من قبل؟؟ يعني ميكونش داك الاسم مستعملو شي شخص فشي شركة اخرى... من بعد كتكمل و تأكد المعلومات وتخرج واحد الورقة كتمشي للمركز الجهوي تدي ديك الورقة و تدي مبلغ 230 درهم من بعد اقل من يوم لمكانش مشكل كتخرج ليك التسمية، اللي كتكون صالحة لمدة عام، يعني الوقت اللي بغيتي كمل المراحل، لا فتي عام ومدرتي والو خاصك تعاود دير طلب وتديه ليهم وتخلص.

من بعد نا كتخرج التسمية كتجي مرحلة القانون الاساسي المعروف ب statut كتصوبو اش كيكون فيه سمية المسيرين مبلغ رأس المال ( بالنسبة لراس المال مبقاش ضروري تحطو فالبنكة و تبلوكيه و تجيب ديك الورقة من البنكة بالي المبلغ كاين، يعني تقدر تبدى ب 0 درهم ولكن المبلغ ديال راس المال كديرو فالقانون الاساسي اللي كنسميوه حنا صحاب الاختصاص statut).
الهدف من تأسيس الشركة، كيفاش قسمتو داك رأس المال، كل واحد والحصة ديالو وشكون اللي غيكون المسير، هد القانون الاساسي غيخصك فالتالي تصادق عليه عند السلطات المحلية و دير فيه التنمبر، غيخصك تطبع منو 5 نمادج.

قبل من القانون الاساسي كتكون اصلا عارف فين غدير المقر، واش كاري محال واش عندك شاريه واش غدير غير توطين عند شي مكتب خاص بالتوطين، هاد التوطين بالفرنسية هو domiciliation، كل وحد واش غيخصك تجيب، كنتي كاري غيخصك نجيب عقد الكراء زائد شهادة الملكية ديال مول الحل او المكتب اللي غتكري، كان المحل ديالك ضروري تدلي بشهادة الملكية، كنتي غدير التوطين، غتجيب شهادة التوطين من عند اللي در ليك التوطين وتجيب نسخة من شهادة الباتانتا و تجيب نسخة من عقد الكراء ديالو ولا نسخة من عقد الكراء ديالو، وحدة من هد الوتائق غيخصك طبعها و تصادق عليها شي 3 ولا 4 المرات زائد الاصلية.

من بعد غنجيو لما هو مهم عند مركز الاستثمار، les formulaires uniques هاد الوثيقة منين غتجيبها، غتدخل للموقع اللي دكرت الفوق و تمشي لابلاصة خاصة بهد les formulaires كيكونو فيها معلومات اللي درتي فالقانون الاساسي كتعمرهم بحدر و عنداك تغلط، من بعد كتسالي تعمار كتطبع دوك الوثائق 5 المرات زائد كيعطيوك واحد الورقة اش غيخصك تجيب يعني واخا تنسا شي ورقة، غتلقهم ديجا طلبوها ليك فهديك لوريقة اللي كطبع، ولكن ديك الوريقة مكيعطيوها ليك تا كتبغي تاخد رونديفو مع احد الاشخاص فالمركز الجهوي للاستثمار، غير كتاخد موعد كيتخرج ليك.

بطبيعة الخال غدير فوطوكوبي لاكارط ديال مسير و كل معلومة تسهل عليك الضوسي ميرجعش.

من بعد ما خديتي الموعد جا النهار اللي غتمشي، غادي تدي معاك دوك لوراق كاملين، زائد مبلغ 350 درهم، من قبل كانت 1250 دابا كلشي سهال، من بعد ماياخدو ضوسي و ميكون ناقصك والو غيعطيوك واحد الورقة صغيرة واحد 10 ولا 15 يوم ترجع عندهم تلقا الشركة وجدات، غيعطيوك كولشي CNSS, patent, identifiant fiscale, registre de commerce, غتبقا خاصاك غير الاشهار فالجريدة، يا إما الجريدة الرسمية يا إما شركة خاصة بالاعلانات ب 150 تال 200 درهمو هانتا قاديتي كلشي.

ومننساوش القانون الاساسي فاش كتصادق غليهم عند السلطات المحلية يعني المقاطعة كتخلص تانمبر ديال 20 درهم على كل ورقة ، 5 نسخ كل نسخة 100 درهم (يعني 5 الورقات) 500 درهم.

والسلام



Pour supporter l'équipe du site ,Partagez sur
logoblog
Previous
« Prev Post

4 commentaires:

  1. سلام خويا بخير شكرا على الموضوع بغيت نسولك على الاشهار الى تعطلت عليه ياك ما يوقع شيحاجة وشكرا مرة اخرى

    RépondreSupprimer
  2. الله يرحم الواليدين

    RépondreSupprimer